21 красавіка 2022 года Старшыня Палаты прадстаўнікоў Нацыянальнага сходу Рэспублікі Беларусь Андрэйчанка У.П. здзейсніў рабочую паездку ў Глыбоцкі раён Віцебскай вобласці.

У ходзе прыёму ў Глыбоцкім райвыканкаме кіраўнік Палаты прадстаўнікоў прыняў шэсць грамадзян з Глыбоцкага, Міёрскага і Шаркаўшчынскага раёнаў.

Пытанні, з якімі да яго звярнуліся выбаршчыкі, датычыліся правядзення капітальнага рамонту жылога дома, заключэння дагавора паміж індывідуальным прадпрымальнікам і філіялам «Наваполацкводаканал» УП «Віцебскаблводаканал», замены вокнаў у доме, які з’яўляецца гісторыка-культурнай каштоўнасцю, поўнай кампенсацыі затрат на газазабеспячэнне жылога дома, датэрміновага выкарыстанні сродкаў сямейнага капіталу і іншыя.

Пасля прыёму У.П.Андрэйчанка адказаў на пытанні журналістаў.

У прыватнасці ён адзначыў, што да кожнага чалавека, які звяртаецца з пытаннем, просьбай, пажаданнем — індывідуальны падыход. «Мэта ў нас адна – дапамагчы людзям у рамках заканадаўства», — падкрэсліў парламентарый.

Гаворачы аб перспектывах удасканалення работы са зваротамі грамадзян, У.П.Андрэйчанка расказаў, што ў Палаце прадстаўнікоў знаходзіцца на разглядзе Закон аб удасканаленні парадку падачы зваротаў грамадзян. У гэтых мэтах праводзіцца доследная эксплуатацыя адзінай інфармацыйнай рэспубліканскай сістэмы па ўліку і апрацоўцы зваротаў грамадзян і юрыдычных асоб. «Калі гэтая сістэма будзе прынята, то кожны грамадзянін праз свой асабісты кабінет зможа ўбачыць, што яго зварот адпраўлены, атрыманы, зарэгістраваны, зможа даведацца, хто разглядае яго зварот, а таксама атрымае адказ. Гэта значыць, такім чынам праца са зваротамі грамадзян стане больш празрыстай і зразумелай грамадзянам. І, магчыма, гэта дазволіць скараціць колькасць наведнікаў на асабістых прыёмах службовых асоб. Разам з тым гэта не значыць, што такія прыёмы перастануць праводзіцца, а пісьмовыя, вусныя звароты не будуць разглядацца. Мы робім усё для зручнасці людзей», — падкрэсліў Старшыня Палаты прадстаўнікоў.