22 ліпеня 2020 года старшыня Пастаяннай камісіі Палаты прадстаўнікоў Нацыянальнага сходу Рэспублікі Беларусь па міжнародных справах Савіных А.У. і дырэктар ДУ «Нацыянальнае агенцтва інвестыцый і прыватызацыі» Красоўскі Д.А. падпісалі план узаемадзеяння па пытаннях прыцягнення замежных інвестыцый у Рэспубліку Беларусь.

Асноўная мэта плана — вызначыць пералік інвестыцыйных праектаў, перспектыўных для прасоўвання інтарэсаў Рэспублікі Беларусь на міжнароднай арэне, з мэтай садзейнічання іх наступнай рэалізацыі парламенцкімі метадамі. Роля дэпутатаў будзе заключацца ў распаўсюджванні інфармацыі аб інвестыцыйных праектах, аказанні агульнага садзейнічання ў прыцягненні інвестараў. Прадугледжваецца правядзенне ў кожнай вобласці навучальных мерапрыемстваў з удзелам дэпутацкага корпуса па сучасных падыходах прасоўвання эканамічных інтарэсаў за мяжой.

У Парламенце Рэспублікі Беларусь дзейнічае 72 рабочыя групы па супрацоўніцтве з парламентамі замежных дзяржаў. Уключэнне інвестыцыйнай праблематыкі ў сферу абмеркавання і ўзаемадзеяння па лініі гэтых парламенцкіх груп з’яўляецца даволі перспектыўным напрамкам. Паколькі беларускія дэпутаты вельмі актыўна працуюць з парламентарыямі замежных дзяржаў, мяркуем, што рэкамендацыі замежных калег прадстаўнікам дзелавых колаў сваіх краін будуць выступаць дадатковымі гарантыямі выканання праекта ў адпаведнасці з усімі дамоўленасцямі.