27.03.2019

27 сакавіка 2019 года адбылося выязное пасяджэнне Пастаяннай камісіі Палаты прадстаўнікоў па адукацыі, культуры і навуцы на базе дзяржаўнай установы адукацыі «Цэнтр павышэння кваліфікацыі кіруючых работнікаў і спецыялістаў Міністэрства фінансаў Рэспублікі Беларусь» на тэму «Аб некаторых асаблівасцях і праблемах арганізацыі дадатковай адукацыі дарослых».

У пасяджэнні камісіі акрамя дэпутатаў Пастаяннай камісіі Палаты прадстаўнікоў па адукацыі, культуры і навуцы прынялі ўдзел адказныя работнікі Міністэрства адукацыі Рэспублікі Беларусь і Міністэрства фінансаў Рэспублікі Беларусь.

Сваю працу ўдзельнікі пасяджэння пачалі са знаёмства з арганізацыяй адукацыйнага працэсу ў Цэнтры павышэння кваліфікацыі кіруючых работнікаў і спецыялістаў Міністэрства фінансаў Рэспублікі Беларусь, з матэрыяльна-тэхнічнай базай гэтай установы адукацыі.


Адкрываючы пленарнае пасяджэнне, старшыня Пастаяннай камісіі Палаты прадстаўнікоў па адукацыі, культуры і навуцы І.А.Марзалюк адзначыў, што правядзенне мерапрыемства актуальна ў сувязі з тым, што ў цяперашні час у завяршальнай стадыі знаходзіцца работа па падрыхтоўцы Саветам Міністраў Рэспублікі Беларусь праекта новай рэдакцыі Кодэкса Рэспублікі Беларусь аб адукацыі, які ў бліжэйшы час паступіць для разгляду ў Палату прадстаўнікоў. У новай рэдакцыі Кодэкса да асноўных напрамках дзяржаўнай палітыкі ў сферы адукацыі аднесена норма, згодна з якой забяспечваецца права на адукацыю на працягу ўсяго жыцця ў адпаведнасці з патрэбамі асобы, адаптыўнасць сістэмы адукацыі да ўзроўню падрыхтоўкі, асаблівасцей развіцця, здольнасцей і інтарэсаў чалавека. Дадзеная норма пазіцыянуе пастаяннае развіццё і ўдасканаленне асобы на працягу ўсяго жыццёвага перыяду. Гэтую задачу закліканая выконваць і сістэма дадатковай адукацыі дарослых у Рэспубліцы Беларусь.


Сёння гэтая сістэма з’яўляецца адным з найважнейшых фактараў сацыяльна-эканамічнага развіцця краіны і ўяўляе сабой гнуткую, мабільную сістэму, якая пастаянна развіваецца. Яна заклікана вырашаць і ў цэлым вырашае задачы забеспячэння галін эканомікі прафесійнымі кадрамі патрэбнага ўзроўню кваліфікацыі, кадравай падтрымкі інавацыйных працэсаў, задавальнення патрэб грамадзян у прафесійным ўдасканаленні. Павышэнне кваліфікацыі і перападрыхтоўку кіруючых работнікаў і спецыялістаў, а таксама рабочых і служачых ажыццяўляюць амаль 400 устаноў адукацыі. Гэтыя ўстановы розныя па статусе, ведамаснай прыналежнасці, формах уласнасці.


Знаёмства з працай Цэнтра павышэння кваліфікацыі кіруючых работнікаў і спецыялістаў Міністэрства фінансаў Рэспублікі Беларусь, а таксама дэталёвае абмеркаванне пытанняў парадку дня падчас правядзення пленарнага пасяджэння будуць садзейнічаць павышэнню якасці падрыхтоўкі праекта новай рэдакцыі Кодэкса аб адукацыі да разгляду яго Палатай прадстаўнікоў.

У адпаведнасці з праграмай пасяджэння былі заслуханы выступленні начальніка галоўнага ўпраўлення фінансавання сацыяльнай сферы і навукі Міністэрства фінансаў Рэспублікі Беларусь Астрэйкі Т.А. і начальніка аддзела дадатковай адукацыі дарослых галоўнага ўпраўлення прафесійнай адукацыі Міністэрства адукацыі Рэспублікі Беларусь Машарскага А.А.


У ходзе праведзенага абмену думкамі ўдзельнікі пасяджэння паднялі шэраг праблем, якія павінны быць вырашаны ў ходзе ўдасканалення заканадаўчай базы для сістэмы дадатковай адукацыі дарослых.

Па выніках пасяджэння прынята рашэнне прааналізаваць паступіўшыя ў ходзе яго правядзення прапановы з мэтай іх абагульнення і магчымага ўліку пры рабоце над праектам новай рэдакцыі Кодэкса Рэспублікі Беларусь аб адукацыі.



Усе навіны
Галоўныя навіны
Усе навіны Заканадаўчая дзейнасць Грамадска-палітычная дзейнасць Міжнародная дзейнасць