28 мая 2019 года намеснік Старшыні Палаты прадстаўнікоў Нацыянальнага сходу Рэспублікі Беларусь Пірштук Б.К. прыняў удзел у канферэнцыі «Рэалізацыя канстытуцыйнага права грамадзян на аб’яднанне».

На мерапрыемстве, прысвечаным святкаванню 25-годдзя з дня прыняцця Канстытуцыі Рэспублікі Беларусь і станаўлення інстытута прэзідэнцтва і арганізаваным Міністэрствам юстыцыі Рэспублікі Беларусь сумесна з установай адукацыі Федэрацыі прафсаюзаў Беларусі «Міжнародны ўніверсітэт «МІТСО», прынялі ўдзел прадстаўнікі дзяржаўных органаў і грамадскіх аб’яднанняў.

Выступаючы на канферэнцыі, намеснік Старшыні Палаты прадстаўнікоў Пірштук Б.К. адзначыў актуальнасць і своечасовасць тэматыкі мерапрыемства, асабліва падкрэсліўшы пры гэтым, што грамадзянская супольнасць — гэта важны фактар развіцця любой дэмакратычнай дзяржавы. Менавіта таму ў Беларусі вялікая ўвага надаецца забеспячэнню канстытуцыйных правоў і свабод грамадзян.

Паводле слоў віцэ-спікера Палаты прадстаўнікоў, у краіне ўпарадкаваны палітычны ландшафт, створаны аптымальныя ўмовы для развіцця дэмакратычных інстытутаў. І сёння наша грамадзянская супольнасць — гэта магутная, разгалінаваная структура, якая мае велізарны творчы патэнцыял, што раскрыты далёка не цалкам.

Як адзначыў Б.К.Пірштук, Беларусь — ледзь ці не адзіная постсавецкая краіна, якая захоўвае стабільнасць. Пры гэтым ён выказаў меркаванне, што гэта стала магчымым дзякуючы таму, што дзяржава рэалізуе моцную сацыяльную палітыку. Дэвіз «Дзяржава — для народа» азначае тое, што ва ўладзе няма іншых прыярытэтаў, акрамя забеспячэння даброт для кожнага грамадзяніна краіны.

У сваім выступленні намеснік Старшыні Палаты прадстаўнікоў падкрэсліў, што, кажучы аб сацыяльнай справядлівасці і сацыяльнай салідарнасці, часта апускаецца такое паняцце, як сацыяльная адказнасць. У той жа час менавіта сёння гэта паняцце становіцца для нас ключавым. «Не замест, а разам», кансалідацыя ўсіх канструктыўных сіл — гэта і ёсць магістральны напрамак развіцця нашых дэмакратычных інстытутаў, падагульніў Б.К.Пірштук.

На заканчэнне ён пажадаў удзельнікам канферэнцыі плённай працы і выказаў упэўненасць у тым, што сённяшні мазгавы штурм будзе карысны для ўсіх удзельнікаў канферэнцыі і зможа ўзбагаціць свежымі ідэямі і праектамі.

У мерапрыемстве таксама прыняла ўдзел старшыня Пастаяннай камісіі Палаты прадстаўнікоў па правах чалавека, нацыянальных адносінах і сродках масавай інфармацыі Ражанец В.В.