Інфармацыйна-аналітычнае ўпраўленне

Паштовы адрас:
вул. Савецкая, 11, 220010, г. Мінск, Рэспубліка Беларусь

Факс:  +375 (17) 222-32-13
Тел.:   +375 (17) 222-64-75
            +375 (44) 755-22-94

Электронная пошта:
inform@house.gov.by


31.05.2017

31 мая 2017 года адбылося сумеснае пасяджэнне палат Нацыянальнага сходу Рэспублікі Беларусь па пытаннях дэпутатаў Палаты прадстаўнікоў, членаў Савета Рэспублікі і адказаў Урада Рэспублікі Беларусь.

Перад парламентарыямі выступіў Намеснік Прэм’ер-міністра Рэспублікі Беларусь Жарко В.І. з дакладам на тэму «Аб пытаннях развіцця сацыяльнай сферы».

Намеснік Прэм’ер-міністра ахарактарызаваў сітуацыю, якая складваецца ў галінах аховы здароўя, сацыяльнай абароны, адукацыі, культуры, спорту і турызму.


Мэтавы арыенцір дзяржаўнай сацыяльнай палітыкі, заявіў Намеснік Прэм’ер-міністра, застаецца нязменным і накіраваны на забеспячэнне ўсім грамадзянам краіны годнай якасці жыцця.

У ліку важнейшых задач бягучага перыяду В.І.Жарко назваў захаванне гарантаванага ўзроўню паслуг і дабрабыту насельніцтва. Дасягнутыя суадносіны памеру сярэдняй пенсіі па ўзросту і сярэдняй заработнай платы на ўзроўні не менш як 40 працэнтаў будзе вытрымана, запэўніў віцэ-прэм’ер. У гэтых мэтах у бягучым годзе зроблены два пераразлікі памераў мінімальных і сацыяльных пенсій. Чарговыя іх пераразлікі плануецца правесці 1 жніўня і 1 лістапада 2017 года. Акрамя таго, В.І.Жарко паведаміў, што на разгляд кiраўнiка дзяржавы ўжо ўнесены праект Указа аб прызначэнні працоўных пенсій для былых ваеннаслужачых, якія не маюць выслугі для атрымання ваеннай пенсіі, а таксама для асоб, што працяглы час ажыццяўлялі догляд непрацаздольных членаў сям’і. Намеснік Прэм’ер-міністра таксама звярнуў увагу, што з улікам фінансавых магчымасцей у гэтым годзе Урадам будзе разгледжана пытанне павышэння працоўных пенсій.

Паводле слоў Намесніка Прэм’ер-міністра, каб не дапусціць росту малазабяспечанасці, у краіне эфектыўна задзейнічаны механізм мэтавай падтрымкі маламаёмных у рамках сістэмы дзяржаўнай адраснай сацыяльнай дапамогі. У першым квартале яе атрымалі больш за 88 тыс. чалавек на агульную суму 20 млн. беларускіх рублёў. Усяго ж у 2017 годзе ў мясцовых бюджэтах на гэтыя мэты запланавана больш за 78 млн. рублёў. Пры неабходнасці аб’ём сродкаў будзе павялічаны.

Мы паслядоўна вырашаем праблему ўдасканальвання дашкольнай адукацыі, падкрэсліў В.І.Жарко. Беларусь з’яўляецца лідарам сярод краін постсавецкай прасторы па ахопе дзяцей ад аднаго да шасці гадоў дашкольнай адукацыяй. Сто працэнтаў дзяцей пяцігадовага ўзросту ахоплены падрыхтоўкай да школы. Урадам зацверджаны план мерапрыемстваў, які дазволіць да 2020 года зняць праблему крокавай даступнасці ўстаноў дашкольнай адукацыі. Па даных Намесніка Прэм’ер-міністра, у мінулым годзе ў Беларусі пабудавана 12 устаноў дашкольнай адукацыі на 2670 месцаў, да канца года плануецца ўвесці ў эксплуатацыю яшчэ 14 дзіцячых садоў на 2600 месцаў.

Закранаючы пытанні працы сістэмы агульнай сярэдняй адукацыі, віцэ-прэм’ер зрабіў акцэнт на распрацоўцы рацыянальнага механізму змянення рэжыму работы школ. Ён адзначыў, што, з яго пункту гледжання, аптымальным для здароўя дзяцей з’яўляецца пачатак заняткаў з 9 гадзін. Разам з тым пры прыняцці рашэння неабходна ўлічыць усе аспекты –– арганізацыю падвозу і харчавання школьнікаў, расклад заняткаў у гуртках і секцыях, навучанне ў другую змену і інш. Паводле яго слоў, плануецца, што частка школ, дзе ёсць другая змена, будзе пачынаць заняткі ў 8.30. Тыя навучальныя ўстановы, якія працуюць у кругласутачным рэжыме (спартыўныя, кадэцкія, сувораўскія), расклад мяняць не будуць. Таксама В.І.Жарко расказаў аб аптымізацыі ўстаноў адукацыі. Рашэнне па закрыцці школ будзе прымацца толькі пасля стараннага вывучэння сітуацыі ў кожным канкрэтным выпадку, заявіў ён. Пры гэтым будзе ўлічвацца меркаванне насельніцтва.

Ацэньваючы сітуацыю ў галіне прафесійнай адукацыі, Намеснік Прэм’ер-міністра звярнуў увагу на тое, што плануецца змяніць падыходы да прагназавання патрэб і фарміравання заказу на падрыхтоўку кадраў. У цяперашні час Мінадукацыі з’яўляецца каардынатарам работы па фарміраванні дзяржаўнага заказу на падрыхтоўку кадраў і адначасова яго выканаўцам. З прычыны гэтага сістэма прагназавання і фарміравання кантрольных лічбаў прыёму галоўным чынам арыентавана на патрэбы ўстаноў адукацыі, а не эканомікі, адзначыў віцэ-прэм’ер. У сувязі з гэтым органам дзяржаўнага кіравання, аблвыканкамам і Мінскаму гарвыканкаму даручана забяспечыць распрацоўку галіновых і рэгіянальных кадравых праграм, дзе павінны адлюстроўвацца рэальныя прагнозныя паказчыкі, патрэбнасці ў працоўных рэсурсах і заказ на іх падрыхтоўку. Каардынатарамі выканання гэтай задачы выступяць Міністэрства працы і сацыяльнай абароны і Міністэрства эканомікі.

Міністэрства адукацыі на працягу 2017 года правядзе дэталёвы аналіз работы ВНУ, па выніках якога будуць прыняты меры па спыненні падрыхтоўкі незапатрабаваных у эканоміцы спецыялістаў, адзначыў В.І.Жарко. Ён таксама расказаў, што будуць выпрацаваны прапановы па ўдасканаленні правіл прыёму ў вышэйшыя і сярэднія спецыяльныя навучальныя ўстановы. На яго думку, тэставанне з’яўляецца справядлівым спосабам адбору, паколькі ўсе абітурыенты знаходзяцца ў роўных умовах. Магчыма, варта перагледзець падыходы да прыёму на завочную форму навучання, падумаць пра маладых людзей, якія адслужылі тэрміновую ваенную службу, адзначыў віцэ-прэм’ер. Урадам створана міжведамасная рабочая група, якая выпрацуе свае прапановы па гэтым пытанні да 1 верасня 2017 года.

Рана таксама казаць аб адмене абавязковага размеркавання, лічыць В.І.Жарко, паколькі ва ўмовах няпростай сітуацыі на рынку працы гарантаванае першае працоўнае месца з’яўляецца мерай сацыяльнай абароны выпускніка. Па папярэдніх даных, у 2017 годзе з падлягаючых размеркаванню выпускнікоў першае працоўнае месца атрымалі ўжо больш за 95 працэнтаў. Выпускнікам, якія навучаюцца на платнай форме, з iх згоды таксама будзе прадастаўлена першае працоўнае месца, запэўніў віцэ-прэм’ер. Ён праінфармаваў парламентарыяў, што ў цяперашні час на завяршальнай стадыі знаходзіцца работа па карэкціроўцы Кодэкса Беларусі аб адукацыі. В.І.Жарко лічыць, што ў выніку павінен атрымацца вывераны і стабільны дакумент, па якім сістэма адукацыі краіны будзе працаваць не адзін год.

Закранаючы пытанні развіцця культуры, Намеснік Прэм’ер-міністра спыніўся на пытаннях развіцця беларускай кінематаграфіі. У сувязі з тым, што айчыннае кіно застаецца пераважна прадуктам для ўнутранага спажывання, работа Нацыянальнай кінастудыі «Беларусьфільм» павінна кардынальна змяніцца, падкрэсліў В.І.Жарко. Паводле яго слоў, пытанні развіцця нацыянальнай кінавытворчасці знаходзяцца на кантролі Урада. Віцэ-прэм’ер нагадаў, што па даручэнні Кіраўніка дзяржавы да 7 лiстапада 2017 года будуць завершаны работы па рэканструкцыі і будаўніцтве аб’ектаў «Беларусьфільма». Мэта сістэмнай падтрымкі, якая аказваецца айчынным кінематаграфістам дзяржавай, складаецца ў тым, каб дапамагчы ім ствараць прарыўныя кінапраекты.

У завяршэнне даклада Намеснік Прэм’ер-міністра выказаў перакананне, што ў вырашэнні актуальных праблем сацыяльнай сферы сур’ёзную падтрымку Ураду могуць аказаць дэпутаты Палаты прадстаўнікоў і члены Савета Рэспублікі. Затым ён адказаў на пытанні парламентарыяў.

Дэпутат Клімовіч Н.А. звярнула ўвагу на той факт, што грамадзяне Беларусі могуць атрымаць медыцынскую дапамогу ў любой установе аховы здароўя. Але адсутнасць механізмаў узаемаразлікаў вядзе да недаатрымання сродкаў медыцынскімі ўстановамі і зніжэння даступнасці медыцынскіх паслуг. У сувязі з гэтым яна пацікавілася ў В.І.Жарко, ці мяркуюцца ў перспектыве змяненніў сістэме фінансавання ўстаноў аховы здароўя, якія спрыялі б зняццю гэтай праблемы.

Дэпутат Канапацкая Г.А. спытала ў Намесніка Прэм’ер-міністра, ці плануе Урад распачаць новыя меры па кампенсацыі грашовых укладаў насельніцтва, абясцэненых у 90-я гады.


Дэпутат Паліціка В.С. завастрыла праблему алкагалізацыі насельніцтва і прапанавала Ураду разгледзець магчымасць прыняцця дадатковых мер па зніжэнні даступнасці алкаголю шляхам узмацнення жорсткасці акцызнай палітыкі і абмежавання яго распаўсюджвання.


Дэпутат Рыбак А.А. папрасіў віцэ-прэм’ера патлумачыць, ці існуе магчымасць адмены платы за карыстанне грамадскімі туалетамі на аб’ектах чыгуначнай інфраструктуры.


Далей на пытанні парламентарыяў адказвалі міністры.

Дэпутат Чэкан В.І. задаў пытанне Міністру працы і сацыяльнай абароны Касцевіч І.А., на якой стадыі знаходзіцца сёння працэс стварэння мемарыяла ў Курапатах.


Дэпутат Паліціка В.С. папрасіла І.А.Касцевіч удакладніць, як хутка можна чакаць унясення ў Палату прадстаўнікоў законапраекта, які прадугледжвае павышэнне памераў дапамог па беспрацоўі асобам, звольненым па скарачэнні штатаў або ў выніку банкруцтва прадпрыемства.

Дэпутат Канапацкая Г.А. пацікавілася меркаваннем Міністра, наколькі эфектыўныя меры, што прымаюцца Урадам па стымуляванню занятасці і барацьбе з сацыяльным утрыманствам.

Дэпутат Рыбак А.А. прапанаваў І.А.Касцевіч больш поўна ўлічваць прапановы парламентарыяў пры распрацоўцы заканадаўства, у тым ліку ўказаў Кіраўніка дзяржавы, якія рэгулююць пытанні ўдасканальвання пенсійнай сістэмы.

Дэпутат Дарагакупец Ю.І. выступіў з ініцыятывай разгледзець пытанне аб прадастаўленні надбавак да пенсіі грамадзянам, якія маюць высокія дзяржаўныя ўзнагароды.


Дэпутат Мірош В.В. выказаў заклапочанасць у сувязі з павелічэннем у краіне колькасці грамадзян, якія пакутуюць на цукровы дыябет, і спытаў у Міністра аховы здароўя Рэспублікі Беларусь Малашкі В.А., ці існуе ў цяперашні час магчымасць паскорыць працэдуру атрымання некаторымі катэгорыямі асоб, якія маюць такое захворванне, бясплатных лекаў.


Дэпутат Анісім А.М. папрасіла В.А.Малашку пракаментаваць прапанову, каб інвалідам I групы ва ўстановах аховы здароўя аказваліся паслугі па-за чаргой.


Дэпутат Гуйвік Н.В. указала Міністру на зацягванне тэрмінаў будаўніцтва радзільнага дома ў г. Полацку і неабходнасць будаўніцтва міжраённага анкалагічнага цэнтра.


Дэпутат Канапацкая Г.А. звярнулася да Міністра інфармацыі Рэспублікі Беларусь Ананіч Л.С. з пытаннем, якія меры прымае Міністэрства па абароне журналістаў, якія ўдзельнічаюць у асвятленні несанкцыянаваных масавых грамадскіх мерапрыемстваў.


Дэпутат Анісім А.М. папрасіла Міністра юстыцыі Рэспублікі Беларусь Сліжэўскага А.Л. патлумачыць, што плануецца зрабіць, каб законы, прынятыя Парламентам, выдаваліся на дзвюх дзяржаўных мовах.


Дэпутат Старавойтаў А.Г. звярнуўся да першага намесніка Міністра культуры Рэспублікі Беларусь Дрыга І.У. з просьбай праінфармаваць, як выконваецца фінансаванне рамонту музея В.К. Бялыніцкага-Бірулі ў Магілёве.


Дэпутат Дарафеева І.А. папрасіла І.У.Дрыга ўдакладніць некаторыя дэталі парадку вылучэння кандыдатур для прысваення ганаровых званняў у галіне культуры і мастацтва.


Дэпутат Цупрык Л.А. спытаў Міністра, ці можна ў сувязі з вострай неабходнасцю правядзення рамонту музея А.Міцкевіча ў в. Завоссе Баранавіцкага раёна Брэсцкай вобласці паскорыць працэдуру яго перадачы ў камунальную ўласнасць Баранавіцкаму раённаму выканаўчаму камітэту.


Дэпутат Вабішчэвіч П.А. пацікавіўся меркаваннем Міністра ўнутраных спраў Рэспублікі Беларусь Шуневіча І.А. адносна перспектыў развіцця службы ўчастковых інспектараў.

Усяго парламентарыі задалі членам Урада 21 пытанне.
Усе навіны
Галоўныя навіны
Усе навіны Заканадаўчая дзейнасць Грамадска-палітычная дзейнасць Міжнародная дзейнасць