«Аб ратыфікацыі Артыкулаў Пагаднення Азіяцкага банка інфраструктурных інвестыцый»

2 кастрычніка 2018 года Палатай прадстаўнікоў Нацыянальнага сходу Рэспублікі Беларусь прыняты праект Закона Рэспублікі Беларусь «Аб ратыфікацыі Артыкулаў Пагаднення Азіяцкага банка інфраструктурных інвестыцый», унесены ў Палату прадстаўнікоў Саветам Міністраў Рэспублікі Беларусь па даручэнні Кіраўніка дзяржавы.

Азіяцкі банк інфраструктурных інвестыцый (АБІІ) у асноўным ажыццяўляе чатыры прыярытэтныя напрамкі фінансавання: энергетыка, транспарт, водазабеспячэнне і водаачыстка, гарадское развіццё і інфраструктура. Значную ўвагу плануецца ўдзяляць праектам па абароне навакольнага асяроддзя.

Статутны капітал АБІІ складае 100 млрд. долараў ЗША і разбіты на 1 млн. акцый намінальным коштам 100 тыс. долараў ЗША кожная.

Інвестыцыйная палітыка Банка прадугледжвае даванне пазык двух відаў: суверэнныя пазыкі і несуверэнныя пазыкі.

У суверэнных пазыках у якасці пазычальнікаў выступаюць:

урад замежнай дзяржавы — члена Банка (без забеспячэння);

арганізацыя ў замежнай дзяржаве — члене пад яго гарантыю (у якасці забеспячэння).

Ратыфікацыя Артыкулаў Пагаднення дазволіць Рэспубліцы Беларусь выкарыстаць новыя фінансавыя стымулы для каардынавання ініцыятыў у рамках праекта «Адзін пояс, адзін шлях», умацаваць пазіцыю і давер ва ўзаемадзеянні з Кітаем. Фінансуемыя праекты могуць тычыцца стварэння або мадэрнізацыі дзеючых транспартных калідораў, лагістычнай і энергетычнай інфраструктуры, вытворчага напрамку, у тым ліку на тэрыторыі Кітайска-беларускага індустрыяльнага парка «Вялікі камень».

Праект Закона надзяляе паўнамоцтвамі Нацыянальны банк Рэспублікі Беларусь ажыццяўляць захоўванне грашовых сродкаў Банка ў нацыянальнай валюце, а таксама другіх актываў АБІІ.

Акрамя таго, праект Закона ўтрымлівае агаворку, якая ўстанавлівае, што заработная плата і другія даходы за работу або паслугі, якія выплачваюцца Банкам супрацоўнікам АБІІ, якія з’яўляюцца грамадзянамі Рэспублікі Беларусь і прызнаюцца падатковымі рэзідэнтамі, падлягаюць падаткаабкладанню.

Прыняцце праекта Закона дазволіць завяршыць унутрыдзяржаўныя працэдуры для ўступлення Рэспублікі Беларусь у Азіяцкі банк інфраструктурных інвестыцый і стаць яго паўнапраўным членам.