«Аб ратыфікацыі міжнародных дагавораў у рамках Арганізацыі Дагавора аб калектыўнай бяспецы»

2 кастрычніка 2019 года  Палата прадстаўнікоў Нацыянальнага сходу Рэспублікі Беларусь прыняла праект Закона Рэспублікі Беларусь «Аб ратыфікацыі міжнародных дагавораў у рамках Арганізацыі Дагавора аб калектыўнай бяспецы», унесены ў Палату прадстаўнікоў Нацыянальнага сходу Рэспублікі Беларусь Саветам Міністраў Рэспублікі Беларусь па даручэнні Кіраўніка дзяржавы.

Праектам Закона прадугледжваецца ратыфікацыя Другога пратакола аб унясенні змяненняў у Дагавор аб калектыўнай бяспецы ад 15 мая 1992 года, Другога пратакола аб унясенні змяненняў у Пагадненне аб прававым статусе Арганізацыі Дагавора аб калектыўнай бяспецы ад 7 кастрычніка 2002 года, Другога пратакола аб унясенні змяненняў у Статут Арганізацыі Дагавора аб калектыўнай бяспецы ад 7 кастрычніка 2002 года, Трэцяга пратакола аб унясенні змяненняў у Статут Арганізацыі Дагавора аб калектыўнай бяспецы ад 7 кастрычніка 2002 года, якія былі падпісаны на сесіі Савета калектыўнай бяспекі 8 лістапада 2018 года ў г. Астане.

Другі пратакол аб унясенні змяненняў у Дагавор аб калектыўнай бяспецы ад 15 мая 1992 года і Другі пратакол аб унясенні змяненняў у Статут Арганізацыі Дагавора аб калектыўнай бяспецы ад 7 кастрычніка 2002 года былі распрацаваны па ініцыятыве армянскага боку ў сувязі з канстытуцыйнымі зменамі ў гэтай краіне, якія адбыліся ў 2018 годзе.

Паколькі Урад Арменіі заканадаўча надзелены паўнамоцтвамі па кіраўніцтве Узброенымі Сіламі, а Прэм’ер-міністр Арменіі ў якасці Вярхоўнага Галоўнакамандуючага мае права прымаць рашэнне аб іх прымяненні, у артыкулы 3 і 6 Дагавора аб калектыўнай бяспецы і ў артыкул 13 Статута АДКБ былі ўнесены адпаведныя змяненні, якія прадугледжваюць, што Савет калектыўнай бяспекі складаецца з кіраўнікоў дзяржаў-удзельніц або кіраўнікоў урадаў дзяржаў-удзельніц, калi ў адпаведнасцi з заканадаўствам сваёй дзяржавы яны надзелены паўнамоцтвамі прымаць рашэнні па пытаннях, што ўваходзяць у кампетэнцыю Савета.

Другі пратакол аб унясенні змяненняў у Пагадненне аб прававым статусе Арганізацыі Дагавора аб калектыўнай бяспецы ад 7 кастрычніка 2002 года накіраваны на прывядзенне тэрміналогіі ў адпаведнасць з прынятай рэдакцыяй Статута АДКБ, а таксама на ўдакладненне артыкула 11 Пагаднення, у адпаведнасці з новай рэдакцыяй якога Генеральны сакратар, намеснікі генеральнага сакратара, члены іх сем’яў, якія пражываюць разам з імі, калі не з’яўляюцца грамадзянамі дзяржавы знаходжання, карыстаюцца прывілеямі і імунітэтамі ў аб’ёме, прадугледжаным Венскай канвенцыяй аб дыпламатычных зносінах ад 18 красавіка 1961 года для дыпламатычнага агента і членаў яго сям’і.

Трэці пратакол аб унясенні змяненняў у Статут АДКБ прадугледжвае ўнясенне змяненняў у главу VII Статута АДКБ у сувязі з прававым афармленнем статусаў Назіральніка пры АДКБ і Партнёра АДКБ.

Палажэннямі Пратакола прадугледжваецца, што дзяржавы, якія не з’яўляюцца членамі АДКБ, а таксама міжнародныя арганізацыі, зацікаўленыя ў вывучэнні адкрытай нарматыўна-прававой базы, вопыту і практыкі дзейнасці АДКБ без прыняцця абавязацельстваў аб удзеле ў практычных мерапрыемствах Арганізацыі, могуць атрымаць статус Назіральніка пры АДКБ. У сваю чаргу, дзяржавы, якія не з’яўляюцца членамі АДКБ, а таксама міжнародныя арганізацыі, што падзяляюць мэты і прынцыпы АДКБ, жадаючыя ўстанавіць і развіваць з АДКБ адносіны ўзаемавыгаднага супрацоўніцтва ў галінах, якія прадстаўляюць узаемны інтарэс, з прыняццем абавязацельстваў па ўдзеле ў практычных мерапрыемствах АДКБ могуць атрымаць статус Партнёра АДКБ.

Паколькі названыя пратаколы з’яўляюцца папраўкамі да міжнародных дагавораў, згода на абавязковасць якіх для Рэспублікі Беларусь была выказана шляхам ратыфікацыі, у адпаведнасці з Законам Рэспублікі Беларусь «Аб міжнародных дагаворах Рэспублікі Беларусь» гэтыя пратаколы таксама падлягаюць ратыфікацыі.