Рус Бел En
Галоўная / Дзейнасць / Заканадаўчая дзейнасць / Законапраекты, што паступілі на разгляд у Палату прадстаўнікоў

«Аб змяненні Кодэкса Рэспублікі Беларусь аб адукацыі»

Суб'ект права заканадаўчай ініцыятывы: Савет Міністраў
Уваходны нумар: 6449
Апісанне законапраекта

21 снежня 2021 года Палатай прадстаўнікоў Нацыянальнага сходу Рэспублікі Беларусь прыняты ў другім чытанні праект Закона Рэспублікі Беларусь «Аб змяненні Кодэкса Рэспублікі Беларусь аб адукацыі», унесены Саветам Міністраў Рэспублікі Беларусь 22 снежня 2020 года.

Законапраект падрыхтаваны ў мэтах удасканалення норм Кодэкса Рэспублікі Беларусь аб адукацыі (далей — Кодэкс аб адукацыі) з улікам практыкі яго прымянення ў сучасных умовах. Пры гэтым у праекце Закона асобныя прадпісанні прыведзены ў адпаведнасць з заканадаўствам Рэспублікі Беларусь.

Падрыхтоўка новай рэдакцыі Кодэкса аб адукацыі абумоўлена змяненнем структуры вышэйшай адукацыі, уключэннем у сістэму адукацыі Рэспублікі Беларусь сістэмы навукова-арыентаванай адукацыі ўзамен сістэмы паслявузаўскай адукацыі, пашырэннем сферы прымянення мэтавай падрыхтоўкі спецыялістаў і рабочых (служачых) для задавальнення патрэбнасцей у спецыялістах рознага профілю арганізацый, размешчаных як у малых населеных пунктах і на забруджаных тэрыторыях, так і ў іншых населеных пунктах, а таксама ліквідацыяй прабелаў, выяўленых у практыцы прымянення Кодэкса аб адукацыі. Прапануецца ўсталяваць абавязковым у Рэспубліцы атрыманне агульнай сярэдняй адукацыі, уводзяцца нормы, накіраваныя на ўкараненне інклюзіўных падыходаў у адукацыі, якія забяспечваюць роўны доступ да атрымання адукацыі для ўсіх навучэнцаў з улікам іх індывідуальных адукацыйных патрэб і індывідуальных магчымасцей.

Перагледжаны кампетэнцыі дзяржаўных органаў. У шэрагу выпадкаў кампетэнцыя на прыняцце актаў ад урада перададзена на ўзровень рэспубліканскіх органаў дзяржаўнага кіравання. За мясцовымі выканаўчымі і распарадчымі органамі замацавана функцыя ажыццяўлення кантрольнай (нагляднай дзейнасці) — кантроль за забеспячэннем якасці адукацыі.

У ходзе работы па падрыхтоўцы да разгляду ў другім чытанні ў праект Кодэкса дадаткова ўнесены шэраг карэктыў:

узмоцнены выхаваўчы складальнік адукацыі, а да мэт адукацыі, нараўне з інтэлектуальным, маральным, творчым, фізічным і прафесійным развіццём асобы, аднесены фарміраванне патрыятызму, грамадзянскасці. Выхаваўчая работа ў пазавучэбны час павінна быць накіравана на фарміраванне ў навучэнцаў павагі да памяці абаронцаў Айчыны, закону і правапарадку, беражлівых адносін да гісторыка-культурнай спадчыны і традыцый беларускага народа;

прадугледжана арганізацыя транспартнага забеспячэння да месцаў правядзення мерапрыемстваў выхаваўчага характару: экскурсій, фізкультурна-аздараўленчых, спартыўна-масавых, спартыўных, культурных мерапрыемстваў;

істотна пашыраны пералік устаноў адукацыі, асноўным органам самакіравання ў якіх з’яўляецца педагагічны савет. У гэты пералік дадаткова ўключаны ўстановы дадатковай адукацыі дзяцей і моладзі, дадатковай адукацыі адораных дзяцей і моладзі, выхаваўча-аздараўленчыя ўстановы, сацыяльна-педагагічныя ўстановы, спецыяльныя навучальна-выхаваўчыя ўстановы і спецыяльныя лячэбна-выхаваўчыя ўстановы;

уведзены абавязак для паступаючых на працу на пасады педагагічных работнікаў прад’яўляць выпіску з адзінага дзяржаўнага банка даных аб правапарушэннях аб наяўнасці (адсутнасці) звестак аб злачынствах незалежна ад пагашэння (зняцця) судзімасці, спынення крымінальнага пераследу, прыняцця рашэння аб адмове ва ўзбуджэнні крымінальнай справы;

для дадатковай падтрымкі педагагічных работнікаў у законапраект уключана норма, якая дае права пры наяўнасці свабодных месц ажыццяўляць падвоз педагогаў да месца працы і назад школьнымі аўтобусамі;

удакладнены асобныя палажэнні артыкула, які рэгламентуе парадак адлічэння навучэнцаў. Да падставаў для адлічэння аднесены выпадкі прыцягнення да адміністрацыйнай адказнасці за аднаразовае ўчыненне грубага адміністрацыйнага правапарушэння або прыцягненне да крымінальнай адказнасці за злачынствы супраць чалавека;

удакладнены парадак аднаўлення для прадаўжэння атрымання адукацыі асоб, якія не завяршылі асваенне зместу аднаго з відаў адукацыйных праграм і адлічаных з устаноў адукацыі. Аднаўленне адлічаных будзе ажыццяўляцца не з 1 верасня, як гэта робіцца зараз, а з таго ж семестра (паўгоддзя), з якога яны былі адлічаны;

улічаны прапановы Міністэрства абароны па пытанні ўдасканалення падрыхтоўкі кадраў па ваенных спецыяльнасцях. Педагагічныя работнікі ваеннага інстытута без права юрыдычнай асобы (былы ваенна-медыцынскі факультэт Беларускага дзяржаўнага медыцынскага ўніверсітэта) аднесены да катэгорыі прафесарска-выкладчыцкага складу, асаблівасці прыёму (залічэння асоб), адлічэння і пераводу навучэнцаў па спецыяльнасцях для воінскіх фарміраванняў і ваенізаваных арганізацый будуць рэгулявацца з улікам заканадаўства аб праходжанні адпаведнай службы;

як гэта і ўстаноўлена Канстытуцыяй Рэспублікі Беларусь, прадугледжана арганізацыя адукацыйнага працэсу ва ўстановах адукацыі на дзвюх дзяржаўных мовах.

Па выніках разгляду зваротаў грамадзян вернута норма аб магчымасці атрымання інфармацыі аб медыцынскіх, псіхалагічных, педагагічных абследаваннях, а парадак атрымання інфармацыі аб ходзе і змесце адукацыйнага працэсу будзе вызначацца кіраўніком установы адукацыі з удзелам органа самакіравання, у які ўваходзяць законныя прадстаўнікі навучэнцаў.

Інфармацыя аб законапраекце
Бягучая стадыя: Прыняты ў другім чытанні

Камісія, у якой разглядаецца законапраект: камісія па адукацыі, культуры і навуцы

Адказны дэпутат: Марзалюк Ігар Аляксандравіч


Адказны работнік Сакратарыята:
Гамеза Валерый Валяр’янавіч — загадчык аддзела па падрыхтоўцы законапраектаў і ўзаемадзеянні з Пастаяннай камісіяй па адукацыі, культуры і навуцы


Гісторыя разгледжання
1. Унясенне ў Палату прадстаўнікоў
Дата паступлення ў Палату прадстаўнікоў: 22.12.2020
Скліканне: Сёмае скліканне
Сесія: Пятая сесія

2. Падрыхтоўка да першага чытання
Скліканне: Сёмае скліканне
Сесія: Пятая сесія

3. Першае чытанне
4. Падрыхтоўка да другога чытання
Скліканне: Сёмае скліканне
Сесія: Пятая сесія

5. Другое чытанне
Усе законапраекты