«Аб змяненні Закона Рэспублікі Беларусь «Аб трацейскіх судах»

4 снежня 2019 года Палатай прадстаўнікоў Нацыянальнага сходу Рэспублікі Беларусь прыняты ў першым чытанні праект Закона Рэспублікі Беларусь «Аб змяненні Закона Рэспублікі Беларусь «Аб трацейскіх судах», унесены Саветам Міністраў Рэспублікі Беларусь.

Праектам Закона прапануецца ўстанавiць, што пастаянна дзеючы трацейскі суд, што створаны ў якасці некамерцыйнай арганізацыі, мае права мець сімволіку, якая падлягае дзяржаўнай рэгістрацыі згодна з заканадаўствам Рэспублікі Беларусь аб афіцыйных (геральдычных) сімвалах.

Замацоўваюцца нормы, якія тычацца дзяржаўнай рэгiстрацыi, пастаноўкi на ўлiк пастаянна дзеючых трацейскіх судоў, дзяржаўнай рэгiстрацыi змяненняў i (або) дапаўненняў, унесеных у статут пастаянна дзеючых трацейскіх судоў, а таксама ліквідацыі трацейскіх судоў, у адпаведнасці з падыходамі, што ўжываюцца ў дачыненні да дзяржаўнай рэгістрацыі і ліквідацыі (спынення дзейнасці) суб’ектаў гаспадарання згодна з Дэкрэтам Прэзідэнта Рэспублікі Беларусь ад 16 студзеня 2009 г. № 1 «Аб дзяржаўнай рэгістрацыі і ліквідацыі (спыненнi дзейнасці) суб’ектаў гаспадарання».

Праектам Закона прапануецца прадаставіць Міністэрству юстыцыі Рэспублікі Беларусь і галоўным упраўленням юстыцыі абласных і Мінскага гарадскога выканаўчых камітэтаў паўнамоцтвы ажыццяўляць аналіз адпаведнасці дзейнасці пастаянна дзеючых трацейскіх судоў заканадаўству Рэспублікі Беларусь, уласным рэгламентам, статутам і палажэнням (акрамя дзейнасці, звязанай з разрашэннем спрэчак). Пры гэтым службовым асобам адпаведных органаў прадастаўляецца права ў межах сваіх паўнамоцтваў запытваць і атрымліваць інфармацыю па пытаннях дзейнасці трацейскіх судоў.

У выпадку выяўлення парушэнняў у дзейнасці трацейскіх судоў вышэйназваныя органы юстыцыі будуць мець права выносіць прапановы аб ліквідацыі выяўленых парушэнняў. Акрамя таго, прадугледжана ліквідацыя трацейскага суда ў судовым парадку за невыкананне патрабаванняў, якія змяшчаюцца ў такой прапанове.

Прыняцце рашэнняў аб ліквідацыі пастаянна дзеючага трацейскага суда, створанага ў якасці некамерцыйнай арганізацыі, прапануецца аднесці да кампетэнцыі Вярхоўнага Суда Рэспублікі Беларусь, прыняцце адпаведных рашэнняў у дачыненні да пастаянна дзеючага трацейскага суда, створанага ў якасці адасобленага падраздзялення (падраздзялення) юрыдычнай асобы — да кампетэнцыі абласнога, Мінскага гарадскога суда.

Прадугледжана забарона на заключэнне трацейскага пагаднення, калі адзін з бакоў гэтага пагаднення з’яўляецца заснавальнікам (удзельнікам) трацейскага суда або асобай, звязанай (якая знаходзіцца ў залежнасці) з гэтым трацейскім судом, а таксама юрыдычнай асобай, у якой трацейскі суд створаны ў якасці адасобленага падраздзялення.

Для ўліку інтарэсаў абодвух бакоў трацейскага разбiральнiцтва і пазбягання спрэчак пры фарміраванні складу трацейскага суда праектам Закона выключаецца магчымасць прызначэння суддзяў для вырашэння спрэчкі старшынёй пастаянна дзеючага трацейскага суда, калі бакі не абралі трацейскіх суддзяў, — трацейскія суддзі будуць выбірацца толькі бакамі.

Акрамя таго, вызначана, што ў мэтах каардынацыі дзейнасці трацейскіх суддзяў, забеспячэння абароны іх правоў, прадстаўлення сумесных інтарэсаў, арганізацыі навучання, павышэння кваліфікацыі могуць стварацца грамадскія аб’яднанні трацейскіх суддзяў.